فوٹو: فائل

وزیرِ اعلیٰ پنجاب مریم نواز نے کہا ہے کہ سانحۂ کاہنہ میں 14 معصوم بچے جان سے گئے، والدین کو اپنے بچوں کو باہر پھیجنے سے پہلے تسلی کر لینی چاہیے کہ ان کے بچے محفوظ ہیں، جب کوئی گٹر میں گر کر مرتا ہے، تو یہ میری ذمے داری ہے۔

مریم نواز نے لاہور میں پیغام امن کمیٹی کے اراکین سے خطاب کرتے ہوئے کہا کہ جب کوئی ایسا واقعہ ہوتا ہے تو مجھے رات کو نیند نہیں آتی، انتظامیہ رات کو گٹر کا ڈھکن لگاتی ہے اور کوئی اس کو چوری کر لیتا ہے۔

وزیرِ اعلیٰ پنجاب نے کہا ہے کہ سرگودھا میں بچی کے ساتھ پیش آنے والا واقعہ بہت دلخراش تھا، ایک بچی گھر سے 10 روپے لے کر چیز لینے گئی اور اس کی تذلیل کی گئی۔

انہوں نے کہا کہ معصوم بچی کا گلا کاٹ دیا گیا کہ اس کی پہچان نہ ہو سکے۔

مریم نواز نے کہا کہ سماجی مسائل کا تدارک ہم سب کی اجتماعی ذمے داری ہے، پنجاب میں تمام ادارے محنت اور دلجمعی سے کام کر رہے ہیں، قیامِ امن کے لیے صوبائی کابینہ، آئی جی پنجاب اور انتظامیہ بھرپور محنت کر رہے ہیں۔

وزیرِ اعلیٰ پنجاب نے یہ بھی کہا کہ معرکۂ حق کی کامیابی پاکستان کے ماتھے کا جھومر ہے، معرکۂ حق کے بعد پاکستان کو پوری دنیا میں عزت ملی، معرکۂ حق کا کریڈٹ وزیرِ اعظم شہباز شریف اور فیلڈ مارشل سید عاصم منیر کو جاتا ہے۔