فوٹو: فائل

ہالی ووڈ کی شہرۂ آفاق فلم جراسک پارک کے معروف اداکار سیم نیل 78 برس کی عمر میں چل بسے۔

ان کے اہل خانہ نے ایک بیان میں ان کی وفات کی تصدیق کی۔ سیم نیل کے انسٹاگرام اکاؤنٹ پر جاری بیان میں کہا گیا کہ ان کا انتقال اچانک اور غیر متوقع تھا، تاہم یہ اطمینان کی بات ہے کہ وہ وفات کے وقت کینسر سے مکمل طور پر صحت یاب ہو چکے تھے۔

بیان کے مطابق سیم نیل نے آسٹریلیا کے شہر سڈنی میں آخری سانس لی، اہل خانہ نے ان کی دیکھ بھال کرنے والے نجی اسپتال کے طبی عملے کا خصوصی شکریہ بھی ادا کیا۔

نیوزی لینڈ سے تعلق رکھنے والے سیم نیل نے 1993ء کی بلاک بسٹر فلم جراسک پارک میں ڈاکٹر ایلن گرانٹ کا یادگار کردار ادا کیا تھا۔

انہوں نے 2023 میں شائع ہونے والی اپنی سوانح عمری میں انکشاف کیا تھا کہ وہ تیسرے درجے کے نان ہاجکن لِمفوما میں مبتلا تھے اور ممکنہ طور پر زندگی کے آخری مرحلے سے گزر رہے تھے۔ تاہم رواں برس اپریل میں انہوں نے اعلان کیا تھا کہ علاج کے بعد وہ خون کے سرطان سے مکمل طور پر صحت یاب ہو چکے ہیں۔

سیم نیل نے اپنے فنی کیریئر کا آغاز 1970ء کی دہائی میں کیا تھا اور کئی دہائیوں پر محیط اپنے سفر میں فلموں اور ٹی وی ڈراموں میں درجنوں یادگار کردار ادا کیے۔ ان کی نمایاں تخلیقات میں جراسک پارک، پیکی بلائنڈرز، دی ہنٹ فار ریڈ اکتوبر اور دی پیانو شامل ہیں۔