فوٹو: فائل

مری میں سیاحوں کی گاڑی حادثے کا شکار ہوگئی جس کے نتیجے میں 10 سیاح جاں بحق ہوگئے۔

ڈپٹی کمشنر مری آغا ظہیر عباس شیرازی کے مطابق مری ایکسپریس وے پر کھجٹ کے مقام پر سیاحوں کی وین حادثے کا شکار ہوگئی جس میں اب تک10  افراد کے جاں بحق ہونے کی تصدیق ہوئی ہے جب کہ متعدد افراد زخمی ہیں جنہیں فوری طبی امداد کے لیے قریبی اسپتال منتقل کردیا گیا ہے۔

ڈپٹی کمشنر  نے مزید بتایا کہ مسافر وین میں سوار 23 افراد کا تعلق ملتان سے تھا، مسافر رات 2 بجے ملتان سے مری کے سفر پر نکلے تھے، گاڑی اوور اسپیڈ ہونے کے باعث سائیڈ دیوار سے جاٹکرائی جس سے گاڑی کے انجن میں آگ بھڑک اٹھی اور سلائیڈنگ دروازہ بھی لاک ہوگیا۔

موٹروے پولیس کا کہنا ہےکہ مری ایکسپریس وے وین حادثے میں 13 افراد زخمی بھی ہوئے ہیں جنہیں فوری طبی امداد کے لیے اسپتال منتقل کردیا گیا ہے۔

پولیس کے مطابق حادثے کا شکار ہونے والی وین میں 10 بچے بھی سوار تھے ۔