فوٹو: فائل

لاہور: پنجاب حکومت نے غریب کسان کو چار ایکڑ زرعی زمین 100 روپے سال کی لیز پر دینے کا اعلان کیا ہے۔

وزیراعلیٰ مریم نواز نے لاہور میں اپناکھیت اپناروزگار اسکیم کے تحت 30 ہزار بے زمین اور مستحق خاندانوں کو قابلِ کاشت سرکاری اراضی کی الاٹمنٹ کےلیے کمپیوٹرائزڈ قرعہ اندازی کی۔ 

قرعہ اندازی کے تحت صوبے میں 30 ہزار بے زمین خاندانوں میں ایک لاکھ 21 ہزار ایکڑ اراضی تقسیم کردی گئی جبکہ  کاشت کے لیے دو لاکھ روپے امداد بھی ملے گی۔ 

اس موقع پر خطاب کرتے ہوئے وزیراعلیٰ مریم نواز نے کہا کہ اس  اسکیم کا آغاز  22 اپریل کو کیا جس کے لیے 60 ہزار درخواستیں موصول ہوئیں جن میں سے11 ہزار درخواستیں خواتین کی تھیں۔

انہوں نے کہا کہ 29 ہزارلاٹس کی قرعہ اندازی مکمل ہوچکی ہے، ایک ہفتے میں الاٹمنٹ لیٹراور 31 جولائی تک اراضی کاقبضہ دے دیاجائے گا۔

مریم نواز کا کہنا تھا کہ اس اسکیم کا مقصد بے زمین اور انتہائی مستحق خاندانوں کو معاشی خودمختاری دینا، زرعی پیداوار میں اضافہ اور کسانوں کی عزتِ نفس بحال کرنا ہے۔

انہوں نے کہا کہ  مستحق خاندانوں کو میرٹ پر اراضی دی گئی ہے ، اس سلسلے میں کوئی سفارش یا سیاسی دباؤ قبول نہیں کیا گیا۔ 

وزیراعلیٰ مریم نواز کا کہناتھاکہ پنجاب میں جہاں بھی قابلِ کاشت سرکاری زمین دستیاب ہوگی، اسے مرحلہ وار مستحق خاندانوں میں تقسیم کیا جائے گا۔