مرکزی سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی نے اپنے بیان میں کہا ہے کہ ماہِ رمضان المبارک کے بابرکت ایام اور حضرت امام علی علیہ السلام کی شہادت کے دنوں میں امتِ مسلمہ غم و اندوہ کی کیفیت سے گزر رہی ہے۔ ایسے حساس اور مقدس ایام میں امریکہ اور اسرائیل کی جانب سے اسلامی جمہوریہ ایران کے خلاف کھلی جارحیت اور رہبر عظیم سمیت معصوم شہریوں کو نشانہ بنانا انتہائی قابلِ مذمت اور انسانیت کے خلاف سنگین جرم ہے۔

صہیونی و سامراجی قوتیں اپنے مذموم اہداف میں ناکامی کے بعد بوکھلاہٹ کا شکار ہو کر ایران کے عوامی مقامات، تیل کی تنصیبات، اسکولوں اور ہسپتالوں پر اندھا دھند اور بے رحمانہ بمباری کر رہی ہیں، جو عالمی قوانین اور انسانی اقدار کی کھلی خلاف ورزی ہے۔

ایران میں شبِ قدر اور ایامِ شہادت کی راتیں اس وقت ایک منفرد منظر پیش کر رہی ہیں۔ دارالحکومت تہران سمیت مختلف شہروں میں مومنین کی بڑی تعداد صہیونی و امریکی بمباری کے باوجود صبر و استقامت کے ساتھ عبادت، دعا اور مناجات میں مصروف ہے۔ ایرانی باشعور عوام اپنے شجاع رہبر کی قیادت میں عزم و حوصلے کے ساتھ دشمن کی تمام سازشوں کو ناکام بنانے کے لیے پرعزم ہیں۔

مرکزی سیکرٹری جنرل شیعہ علماء کونسل پاکستان علامہ ڈاکٹر شبیر حسن میثمی نے کہا کہ تمام انسان دوست افراد اور ملتِ اسلامیہ اس مشکل گھڑی میں مظلوم فلسطینیوں، غزہ کے عوام اور اسلامی جمہوریہ ایران کے ساتھ بھرپور اظہارِ یکجہتی کریں۔

انہوں نے کہا کہ قائد ملت جعفریہ پاکستان کے حکم پر اور شیعہ علماء کونسل کی اپیل پر 13 مارچ بروز جمعۃ الوداع (عالمی یوم القدس) کو ملک بھر میں بھرپور انداز سے منایا جائے۔ پاکستان کے چاروں صوبوں، گلگت بلتستان اور آزاد کشمیر کے تمام چھوٹے بڑے شہروں میں صہیونی ظلم کے خلاف احتجاجی مظاہرے اور ریلیاں نکالی جائیں اور نظامِ اسلامی کی نصرت کے لیے خصوصی دعائیں کی جائیں۔